1 Johan 5

Paite Bible

Pathian’ Tapa Upna: Vualzawhna

5 JESU, Khrist ahi, chih um mi peuhmah Pathian’ suan ahi. Pa it mi peuhmah in a Tapa a it hi. ² Pathian it a, a thupiakte i zuihna mah Pathian’ tate i it, chih i theihna hi ahi. ³ Pathian i itna hiai ahi: A thupiakte i zuihna. A thupiakte lah

a zuih haksa kei hi. ⁴ Ahang bel, Pathian’ suan peuhmah in leitung khuavannuai zoukhinta hiven. Leitung khuavannuai nuaisiah a, vualzawhna hiai ahi: I upna. ⁵ Leitung khuavannuai nuaisiaha zou mi kua ahia? Jesu, Pathian’ Tapa ahi, chih um mi ahi leitung khuavannuai nuaisiaha zou mi.

Hotdam Kitheihtelna

⁶ Hiai ahi tui leh sisan pansana hong paipa: Khrist ahipa Jesu. Tui kiain ahi kei a, tui leh sisanin ahi zaw hi. Kha thutak ahih manin, Kha ahi theihpihpa. ⁷ Ahang bel, vantung ah theihpih thum a om: Pa tawh, Thu tawh, Kha tawh. Hiai thumte khat ahi uhi. ⁸ Leitung ah theihpih thum a om: Kha tawh, tui tawh, sisan tawh. Hiai thumte khat bangin a kithukim uhi. ⁹ Mihing’ theihpihna nangawn i sang, ahih¬hangin, Pathian’ theihpihna a thupi zaw hi. Pathian’ theihpihna bel, a Tapa tungthu a theihpihna mah ahi. ¹⁰ Pathian’ Tapa um mi peuhmah in, ama’ lungsung ah theihpihna a nei hi. Pathian um lou mi in bel, Pathian in a Tapa’ tungthu a theihpihna um lou ahih manin, amah zuauthei a suaksak hi. ¹¹ Theihpihna hiai ahi: Pathian in tangtawn hinna eite hon pia a, tua hinna a Tapa-a om ahi, chih. ¹² Tua Tapa nei mi peuhmah in hinna a nei a, Pathian’ Tapa nei lou mi peuhmah in hinna a nei kei hi. ¹³ Pathian’ Tapa’ min a um noute’n tangtawn hinna na nei uh, chih na theih nading ua, noute kianga hiai thilte hon gelh ka hi.

Thuumna-a Kimuanna leh Lainatna

¹⁴ Pathian’ maia kimuanna i neih hiai ahi: Ama’ deihlam thil khat peuh i nget chiangin, ama’n hon ngaikhia, chih. ¹⁵ Ama’n i nget peuhmah hon ngaikhia, chih i theih chiangin, amah apan i nget pen i ngah, chih i thei hi. ¹⁶ Mi kuapeuh in, sihna tun lou khelhna khat peuh hih a sanggam a muh chiangin, amah adingin thuumsak hen. Tua bangin, sihna tun lou khelhna hih mi adingin hinna a pe ding. Sihna tun khelhna a om. Tua tawh kisaiin thum hen, ka chi kei. ¹⁷ Diktatlouhna khempeuh khelhna ahi a, sihna tun lou khelhna zong a om hi.

Khelh Zongsatna apan Suahtakna

¹⁸ Pathian apan piang peuhmah a khialkhial kei, chih i thei. Pathian’ Tapa in amah a kembit

a, giloupa’n amah a khoih thei

kei hi. ¹⁹ Eite, Pathian’ tate i hi, chih i thei a, giloupa’ thunuai ah leitung bup a koltang, chih i thei hi. ²⁰ A Dikpa pen i theih nadingin, Pathian’ Tapa hong pai a, theihsiamna hon peta, chih zong i thei. Eite bel, a Dikpa, tua a Tapa Jesu Khrist mah mah ah i om uhi. Amah Pathian dik ahi a, tangtawn hinna ahi.

²¹ Ka deihthawhte aw, milimte

apan kihem un. Amen.