1 Samuel 3

Paite Bible

Tangtawn Toupa’n Samuel Sam

3 NAUPANG Samuel bel, Eli nuai ah, Tangtawn Toupa’ maia nasemin a om hi. Tua hun laiin, Tangtawn Toupa’ thu a vaang a, mengmuhna a tam kei hi.

² Eli’ mit a bahta a, khua a mu thei khopteek hi. Zan khat, Eli ama’ muna a lup laiin, Samuel zong Pathian’ thukhun singkuang omna, Tangtawn Toupa’ tempul sung ah a lum hi. ³ Pathian’ meivak kide zong a mit nai kei hi. ⁴ Tua laiin, Tangtawn Toupa’n Samuel a sam hi.

Samuel in a dawng a: Hiah ka om, a chi a, ⁵ Eli kianga va-taaiin: Non sam a, hiah ka om, a chi hi.

Ahihhangin, Eli in: Hon sam lou ka hi. Vapai inla, valum in, a chi hi. Samuel a vapai a, a valum hi.

⁶ Tangtawn Toupa’n: Samuel! chi-in a sam kiik hi. Samuel a thou a, Eli kiang ah a vapai a: Non sam a, hiah ka om, a chi hi.

Eli in: Ka tapa aw, hon sam lou ka hi. Vapai inla, valum in, a chi hi.

⁷ Samuel in bel Tangtawn Toupa a meltheih nai kei hi. Tangtawn Toupa’ thu lah ama’ kianga laakkhiaksak ahi nai kei hi.

⁸ Tangtawn Toupa’n a thumvei nadingin Samuel a sam a, Samuel a thou a, Eli kiang ah a vahawh a: Hiah ka om, na hon sam a, a chi hi.

Tua bang a hihtakin, Eli in, Tangtawn Toupa’n naupang sam ahi, chih a phawkkhia hi. ⁹ Tuachi-in, Eli in Samuel kiang ah: Vapai inla, valum inla, ama’n hon sap leh, Tangtawn Toupa, thu gen in, na sila in ngaikhia ka hi, na chi in, a chi hi. Tua bangin Samuel a vapai a, ama’ mun ah a lum hi.

¹⁰ Tangtawn Toupa hong pai a, tua ah hong ding a, hun danga bangin: Samuel! Samuel! chi-in hong sam hi.

Samuel in: Thu gen in, na sila in ngaikhia ka hi, a chi hi.

¹¹ Tangtawn Toupa’n Samuel kiang ah: Ngai in, Israel ah thil khat hih ding ka hi. A za peuhmahte’ bil khawng ding ahi. ¹² Tua hun chiangin, Eli’ innkawte dema ka thugen peuhmah, a bul apan a tawp dongin, Eli’ tunga tungsak ding ka hi. ¹³ Ahang bel, a phawk mahmah khelhna hanga Eli innkawte gawt denden ding ka hi, chih ka hilhta hi. Tua bel, a tapate kihhuai kisuaksak uh a, ama’n lah amaute khou a, kham lou ahihna ahi. ¹⁴ Tua bang ahih mana, Eli’ innkawte’ tunga kichiamta ing a: Kithoihna hi-in, thillat in hita leh, Eli’ innkawte’ khelhna khuh ngei lou ding hi, chita hi’ng, a chi hi.

¹⁵ Samuel bel zingsang dong a lum a, tua khitin, Tangtawn Toupa’ inn kongkhakte a hong hi. Ama’n a mengmuh pen Eli a hilh ngam kei hi. ¹⁶ Ahihhangin, Eli in amah a sam a: Samuel, ka tapa aw, a chi hi.

Samuel in a dawng a: Hiah ka om, a chi hi.

¹⁷ Eli in: Tangtawn Toupa’n na kianga bang gen ahia? Kei apan iim ken. Nang hon hilhte thumal khat dong hon iim na neih peuhmah leh, Pathian in nang hon lawh dandan hon lawh hen, a nase zaw zong hon lawh hen, a chi hi. ¹⁸ Tuachi-in, Samuel in iim nei louin, a hilh vek sipsip hi. Tua khitin, Eli in: Amah Tangtawn Toupa hiven, a mitmuha hoih a sak bangbang hih hen, a chi hi.

¹⁹ Samuel hong khanlet bangbangin Tangtawn Toupa’n a ompih a, ama’n a thugen lei a dengsak kei hi. ²⁰ Tuachi-in, Dan apan Beersheba dongin, Israelte khempeuh in, Samuel zaw Tangtawn Toupa’ kamsang khata hihkip ahita, chih a meltheih uhi. ²¹ Shilo ah Tangtawn Toupa a kilaak zom zel a, a thu tungtawnin Samuel kiang ah amah kipulaakin a kitheisak hi.