1 Timothi 3

Paite Bible

Bishop leh Dekon Chinna

3 HIAI thugen saantaak ahi: Kuapeuh in bishop ^[a] hih a lunggulh leh nahoih sep ut ahi. ² Bishop zaw, genbaanglou, zi khat nei, kidekthei, lungsim chiim, zahtak tham, zindou siam, sinsak thei mi ahi ding ahi. ³ Zukhamhat lou, huham lou, nunnem, kinak hatlou, dangka sum deihta lou ahi ding ahi. ⁴ Ama’ innsung hoihtaka uk a, a tate’n zong zahtakna kilawm tawh a thuman uh ahi ding ahi. ⁵ Ahang bel, ama’ innsung nangawn uk dan theilou mi in Pathian’ saptuam bangchi-in a kem thei dia? ⁶ Piangthak chiil ahi ding ahi kei. Tuachi louin zaw, kisatheiin a kiliansak kha ding a, dawimangpa tawh kibanga mawhpaih ahi kha ding hi. ⁷ Pawlam mite’ phatlawh zong ahi ding ahi. Tuachi louin zaw, minsiain dawimangpa’ thaang ah a awk kha ding hi.

⁸ Tua mah bangin, dekonte ^[b] , zahtak tham, thutak, zukhamhat lou, dangka sum deihta lou mi ahi ding uh ahi. ⁹ Sia-le-pha theihna siangtaka thu-up thusim kiseel lenkip mi ahi zaw ding uh ahi. ¹⁰ Amaute ettel masak hi uh henla, genbaanna a om kei leh, dekon na sem uhen.

¹¹ Tua mah bangin, a zite uh zong, zahtak tham, gensiathat lou, kideek thei leh bangkima muanhuai ahi ding uh ahi.

¹² Dekonte, zi khat nei ahi ding uh a, amau’ tate leh innsung uk zou mi ahi ding uh ahi. ¹³ Nasem hoih dekonte’n phat a lawh uh a, Khrist Jesu a upna uah hangsanna zong a nei uhi.

¹⁴ Na kianga hong pai pah ding lamen mah leng, hiai thuhilhnate kon gelh hi. ¹⁵ Ahang bel, kong zekai khak leh, Pathian’ innkuan sunga bangchi gamtat ding hiam, chih na theih nading ka deihna ahi. Pathian’ innkuan bel, Pathian hing’ saptuam ahi a, tua lah thutak khuampi leh kingakna suangphum ahi. ¹⁶ Nial vuallouhin Pathianmitna thusim kiseel a thupi hi:

Pathian, sa neiin hong kilang a,

Kha in a hihna diktak gen a,

vansawltakte’ muh hi a,

namte laka tangkoupih hi a,

leitung khuavannuaia up hi a,

thupina khua-a laktouha om ahi.