Danpiakthakna 2

Paite Bible

Gamdai-gamkeua Vaakthapna^(A)

2 Tua khitin, i kinunghei uh a, Tuipi San lam lampi zuiin, gamdai-gamkeu lam ah i kipankhia uhi. Tangtawn Toupa’ hon thuhilh bangbang ahi. Ni tampi sung Seir tanggam kimvelin i pai uhi.

² Tua khitin, Tangtawn Toupa’n ka kiang ah: ³ Hiai tanggam kimvela na pai sung uh a sawtta. Tu’n mallam ah kihei un. ⁴ Mipite kiang ah hiai thupiakte pia in: Na sanggamte uh, Esau suan Seir tanggama teengte’ gama paisuak dek na hi uh. Amaute’n noute hon lau ding uh, ahihhangin, pilvang mahmah un. ⁵ Amaute gal bawl dingin hehsak kei un. Ahang bel, amaute’ gam noute hon pe lou ding, na khepek ngakna khop uh zong hon pe lou ding ka hi. Esau kianga, a tan dinga tua Seir tanggam ka piaksa ahi. ⁶ Amaute apan na annekte uh ngun dangka in lei unla, na tuidawnte uh zong ngun dangkain lei un, a chi hi.

⁷ Tangtawn Toupa, na Pathian un na khut nasepte khempeuh uh hon vualzawl hi. Hiai gamdai-gamkeu zapi-a na zin sung uh noute hon veng a, hiai kum 40 sung, Tangtawn Toupa na Pathian un noute hon ompih a, bangmah na tasam kei uhi.

⁸ Tuachi-in, i sanggamte, Esau’ suante, tua Seir tanggama teengte i paikheng uhi. Elath leh Ezion Geber apan hong paiin, Araba lampi apan i kihei uh a, Moab gamdai-gamkeu zuiin i khualzin uhi.

⁹ Tangtawn Toupa’n ka kiang ah: Moabte hihbuai kei unla, gal bawl dingin hehsak kei un. A gam uh neukha zong hon pe lou ding ka hi. Lot’ suante kianga, a tan ding ua, Ar gam ka piaksa ahi, a chi hi.

¹⁰ Tua-a na teengte Emimte ahi uh a, mi hat leh tamte, Anakte banga din sangte ahi uhi. ¹¹ Anakte bangin, miliante ahi uh a, Moabte’n amaute Emimte, a chi uhi. ¹² Seir ah Horte a na teeng uh a, ahihhangin, Esau’ suante’n amaute a hawlkhia uhi. A mai uah Horte a hihmangthang uh a, amaute mun ah a teeng uhi. Tangtawn Toupa’n Israelte luah dinga a piak gama Israelte’ hih bangbanga hih uh a hi ve.

¹³ Tua khitin, Tangtawn Toupa’n: Tuin kisa unla, Zered Phaizang

kaan un, hon chi a, tuachi-in, tua phaizang i kaan uhi.

¹⁴ Kadesh Barnea i nutsiat a, Zered Phaizang i kaan nung, kum 38 a beita hi. Tua hun sungin, Tangtawn Toupa amaute kianga a kichiam bangin, tua khanga galdou thei pasal khempeuh giahphual apan a mangthang vekta uhi. ¹⁵ Tangtawn Toupa’n giahphual apan amaute a beisiangsak sipsip mateng, ama’ khut in amaute dou ahi mahmah hi.

Amonte

¹⁶ Hiai mipite laka galdou thei pasalte a sihbei takun, ¹⁷ Tangtawn Toupa’n ka kiang ah thu a gen a: ¹⁸ Tuni-in, Moab gamgi na kaan ding uh a, Ar Khawpi ah na pai ding uh ahi. ¹⁹ Amonte kiang na tun chiangun, amaute buaisak kei unla, galbawl dingin zong hehsak kei un. Ahang bel, Amonte gam peuhmah na tan ding ua hon pe lou ding ka hi. Lot’ suante’ luah dinga ka piaksa ahita, a chi hi.

Miliante

²⁰ Tua gam zong, tua gama na teeng masa miliante gama ngaih ahi. Amonte’n bel amaute Zamzumte, chi-in a minvawh uhi. ²¹ Amaute bel mihatte ahi uh a, tam zong a tam uhi. Anakte banga din sang ahi uhi. Tangtawn Toupa’n amaute, Amonte’ mai apan a hihmangthang a, Amonte’n amaute a hawlkhia uh a, amau’ mun ah a teeng uhi. ²² Tangtawn Toupa’n Esau’ suante’ maia Horte a hawlkhiak a, tua Seir-a teeng Esau’ suante adinga a hihsak bangbang hihsak ahi. Esau’ suante’n Horte hawlkhiain amaute’ mun ah tu dong a teeng uhi. ²³ Gaza donga khawtate-a teeng Avimte ahih leh, Kaftor apan hong paikhia Kaftorte’n a hihmangthang uh a, amaute’ mun ah a teeng uhi.

Heshbon Kumpipa Sihon Zawhna^(B)

²⁴ Tangtawn Toupa'n: Tuin kisa unla, kuankhia unla, Arnon Lui kaan un. Ngai in, na khut sung uah Heshbon kumpipa, tua Amor mi Sihon leh a gam kon peta hi. Tua gam luah panta unla, amah dou un. ²⁵ Tuni mahmahin vannuaia namte khempeuh tung ah noute launa leh mulkimna ka koih panta ding. Noute tawh kisai thu a za ding uh a, a liing ding uh a, noute hangin a mangbang ding uhi, a chi hi.

²⁶ Ke’n Kedemoth gamdai-gamkeu apanin, Heshbon kumpipa Sihon kiang ah thupawte sawlin kilemna ka tah a: ²⁷ Na gam sung kantanin koute hon paisuaksak in. Lamlian taangpi ka zui ding uh a, veilam hiam taklam hiam ah zong ka pial kei ding uh. ²⁸ Nek ding an leh dawn ding tui hon leisak unla, a man ngun dangka-in kon pe ding uh. Khein hon paisuaksak lel un. ²⁹ Seir-a teeng Esau’ suante leh Ar-a teeng Moabte’n koute hon paisak bangun, Tangtawn Toupa’n koute hon piak gam ka tun ua, Jordan lui ka kaan mateng uh hon paisak un, ka chisak hi. ³⁰ Ahihhangin, Heshbon kumpipa Sihon in hon paisuaksak nuam kei hi. Ahang bel, Tangtawn Toupa na Pathian un noute khutsunga amah hon piak nop man ahi a, Ama’n tuni-a na muh bangun, ama’ lungsim a khauhsak a, a lungtang a genhaksak-a ahi.

³¹ Tangtawn Toupa’n ka kiang ah: Ngai in, na khut sung uah Sihon leh a gam kon pe-panta. Tuin, a gam la panta unla, luah panta un, a chi hi.

³² Sihon leh a mite khempeuh Jahaz muna eite hon tuak a, hon dou dinga hong kuankhiak laiun, ³³ Tangtawn Toupa i Pathian in eite khut sung ah amah hon pia a, amah leh a tapate leh a mite khempeuh tawh i thatvek uhi. ³⁴ Tua hunin a khawpite khempeuh i la uh a, i hihse vek sipsip a, numei, pasal leh naupang tawh i hihmangthang khawm vek hi. A suakta himhim i hawi kei hi. ³⁵ Ahihhangin, i laksa khawpite apan ganhonte leh gallak vante bel eima’ tan dingin i paw mang uhi. ³⁶ Arnon Kuam geia om Aroer khawpi apan tua lui phaia om Gilead gam donga khawpite khat beek zong eite adinga hat lua a om kei hi. Tangtawn Toupa i Pathian in tuate khempeuh hon pevek hi. ³⁷ Ahihhangin, Tangtawn Toupa i Pathian in thu hon piak bangin, Amonte gam koimah, Jabok lui dong hi-in, mualtunga khawpite’ kim leh pam gam hita leh na naih kei uhi.