Danpiakthakna 32

Paite Bible

Mosi’ La

32 VAANTE aw, bil dawh un,

thu gen ding hi’ng.

Lei aw, ka kama thu za in.

² Ka sinsakna vuah bangin

taaksuk henla,

ka thugen daitui siang

bang hen.

Lounou tunga vuahmal taaksuk

bang henla,

loupa tunga vuahphin bang hen.

³ Tangtawn Toupa’ min phuang ding

ka hi.

I Pathian thupina phat un aw!

⁴ Amah tua Suangpi hi a,

a nasep hoihkim hi.

a lampite dika thukhenna hi a,

amah thutak Pathian hi a,

amah zaw diktat leh tang hi ahi.

⁵ Amaute ama’ mai ah kihihsegawp

uh a,

a maizum nading ua,

ama’ tate hi nawnlou uhi.

Amaute zaw khang tatsia leh

gilou hi uhi.

⁶ Nou mihai leh mipilloute’n

Tangtawn Toupa na ditna uh

hibang hi maw?

Amah noute’ Pa, noute hon leipa

hilou maw?

Ama’n noute hon bawl a,

hon tungding hilou maw?

⁷ Tanglai nite thei gige unla,

khang tampite khanlai

nite suut un.

Na pa uh dong un, ama’n hon

hilh ding hi.

Na upate uh dong un,amaute’n

hon hilhchian ding uhi.

⁸ Tungnungpen in namte laka a

goutante uh

a hawmsak laia,

mite a khenzak laia,

Israel tate tamdan zuia,

namte gamgite khung hi.

⁹ Ahang bel,Tangtawn Toupa’ tantuan

a mite hi a,

Jakob lah a goutan hi ahi.

¹⁰ Ama’n gamdai-gamkeu ah amah

mukhhia a,

gamsia leh gam vuak,

a daihsip sipna ah

amah mukhia hi.

Ama’n amah hum a, amah don a,

a mitnauta banga kem hi.

¹¹ Muvanlai in a bu thaidalh a,

a noute tunga phe velvela leng a,

amaute dom dinga kha

zak a,

a kha tunga amaute

a puak bang hi ahi.

¹² Tua banga Tangtawn Toupa kia in

amah pii a,

ama’ kianga gamdang pathian

khat beek om lou hi.

¹³ Ama’n leitung a sanna munte-a

amah tuangsak a,

gam gahtein vak a,

suangpi apan khuaizu in taisak a, ^[a]

meisah suang heng apan sathauin

thausak hi.

¹⁴ Bawnghonte apan bawngnawi dat,

belam leh kelhonte apan

nawitui,

belamnou thaute tawh

pia hi.

Bashan belamtalte leh kelte,

huit buh hoihpente tawh

pia hi.

Zu, tua grepte sisan banga san

nang dawn na hi.

¹⁵ Ahihhanga, Jeshurun ^[b] hong thau a,

hong kipek hi.

Hong vah a, hong gik a,

hong mam hi.

Tua chianga ama’n amah siampa

Pathian taisan a,

a hotdamna Suangpi nolh hi.

¹⁶ Amaute’n gamdang pathiante

pansana

ama’ thikthu sesak uh a,

thil kihhuai zanga

hehsak uhi.

¹⁷ Pathian hilou dawite’

mai ah kithoihna laan uh a,

a theih louh uh pathiante,

hong kilang tawm thak

pathiante,

na pu na pate un a lau louh uh pathiante’

mai ah kithoihna laan uhi.

¹⁸ Noute ta-a hon nei tua Suangpi

taisan hi uteh,

noute hon bawlpa Pathian

mangngilh hi uteh.

¹⁹ Tangtawn Toupa'n tua mu a,

amaute nolh hi.

A tapate leh tanute’n

amah a hehsak man uh ahi.

²⁰ Ama’n: Amaute apan ka mai seel

ding hi’ng,

khang tatsiate, upnabei tate

a hih man ua,

a beina uh tungsak ding hi’ng.

²¹ Pathian hiloute zanga

ka thikthu sesak uh a,

a mannabei a milimte uh zanga

hon hehsak uhi.

Ke’n nam hiloute zanga

hazatna amaute neisak

ding ing a,

theihsiamna bei nam khat zanga

amaute hehsak ding hi’ng,

²² Ahang bel, ka hehna mei kuang a,

gawtmun nuainungpen donga

kaang ding hi.

A kuang semsem in leitung

leh a gahte kangtum

ding a,

mualte kingakna suangphumte

kaang ding hi.

²³ Amaute tunga tuahsiatna vumsak

ding ing a,

amaute tunga ka thaltangte

zang ding hi’ng.

²⁴ Amaute gilkiala gawnggawp ding

uh a,

hipi leh siatna khatak in

amaute

negai ding hi.

Amaute sual dinga gamsate’

hate sawl

ding ing a,

leilaka bokvak thangtom gute

sawl ding hi’ng.

²⁵ Kongzing khawnga namsau in

amaute

tabeia koih ding a,

a inn sung uah mulkimna

leng ding hi.

Tangvalnou leh nungaknoute,

nawi nelai naungekte leh

a teek samkangte mangthang

ding uhi.

²⁶ Amaute thehzak ding ing a,

amaute theih gigena mihingte

lak apan beisak ding hi’ng,

chikhin hi’ng.

²⁷ Ahihhanga, melmapa’ totna

lau ing a,

tua hi kei leh,

langpangpa’n theikhial a:

I khut vualzouta e, hiaite

khempeuh hihpa

Tangtawn Toupa hi kei,

chi kha ding hi, chi hi.

²⁸ Ahang bel, amaute pilna neilou

nam hi uh a,

amaute sunga theihsiamna

om lou hiven.

²⁹ Amaute pilin hiai theisiam nuam

hi liai uh henla,

a tawpna ding uh thei le uh zaw!

³⁰ Bangchi-a mi khat in mi

sang khat

delhzaak thei ding,

bangchi-a mi nih in mi

sangsawm

taaikeeksak thei ding,

a Suangpi un amaute

khawngkhia a,

Tangtawn Toupa'n amaute

pekhia ahih kei ngalleh?

³¹ Ahang bel, amaute’ suangpi lah

eite Suangpi bang hilou a,

i langpangte mahmah

nangawn in,

ahi, theihpih uh hiven.

³² Ahang bel, a grepgui uh Sodom

grepgui hi a,

a loute uh Gomora loute

hiven.

A grepgahte uh gu tawh

kidim a,

a gahbawkte kha vek hiven.

³³ A zute uh gulgu hi a,

sokval gu hat hi ahi.

³⁴ Ama’n: Hiai kei kianga

kholkhawm,

ka goubawma khumchip

ahi kei ahia?

³⁵ Phulakna keia hi a,

ditna keia hi ahi.

A hun taka amaute’ khe

taal ding hi.

Ahang bel, a tuahsiat ni uh

naita a,

tua thilte amaute tunga

tungpahta ding hi, chi hi.

³⁶ Ahang bel, Tangtawn Toupa'n

a mite tunga thu khen ding a,

a silate lainat ding hi.

Amaute’ vangletna beita,

chih a muh chianga,

³⁷ ama’n: Amaute’ pathiante koia

omta a,

buk nadinga a zon uh suangpi

koia omta hiam?

³⁸ Tua a kithoihna sathaute uh ne a,

a dawn thillatte uh dawnte

koia omta hiam?

Thou-in noute hon huh le uh

a kei dia,

na bukna uh hi le uh a kei dia!

³⁹ Tu’n thei in, kei, keimah

amah hi’ng,

Kei lou pathian dang om lou hi.

Ke’n that ing a, hingsak

ing a,

ke’n liamsak ing a, damsak

ing a,

ka khut apan amaute kuama’n

humbit thei lou ding hi.

⁴⁰ Ahang bel, ke’n ka khut vanlama

liiktou ing a:

Kei a hingden ka hih

takpi mana,

⁴¹ ka namsau tathiam ing a,

ka khutin dika thukhenna a

tawi chianga

ka langpangte thuk ding ing a,

kei hon mudahte dinkik ding

hi vengin.

⁴² Ka thaltangte sisan dawnkhamsak

ding ing a,

ka namsau in sa ne ding a,

thahte leh matte’ sisante

leh

melmapa’ makaite’ lutang sate

hi ding hi, chi ding hi.

⁴³ Namte aw, ama’ mite tawh

lungnuamkhawm un.

Ahang bel, ama’n a silate’ sisan

phuba la ding a,

a melmate tunga phulakna

tun ding a,

ama’ gam leh ama’ mite,

adinga khuhna bawlsak

ding hiven,

chi-in.

⁴⁴ Tuachi-in, Nun’ tapa Joshua tawh Mosi hong pai a, mipite zakin hiai lathute khempeuh a gen hi. ⁴⁵ Mosi in hiai thute khempeuh Israelte kianga a genkhit-in, ⁴⁶ amaute kiang ah: Tuni-a noute laka theihpihna thu ka gente khempeuh lungtanga na kep ding uh, hiai dante pilvangtaka zui dinga na tate uh thu na piak ding uh ahi. ⁴⁷ Ahang bel, hiai noute adinga bangmah lou maimai hi zenzen lou a, na hinna uh hi ahi. Jordan luigal kaha na va luah ding uh gamsunga hiai thute pansana na damsung nite uh sausak ding na hi uhi, a chi hi.

Nebo Muala Mosi

⁴⁸ Tua khitin, Tangtawn Toupa'n tua ni mahmah-in Mosi a houpih a: ⁴⁹ Jerikho gala Moab gama Abarim mual, tua Nebo Mual kichi ah kahtou in. Tua apanin Kanan gam, Israel tate a goutan ding ua ka piak gal-et inla, ⁵⁰ Hor Muala na sanggampa Aron a sih a, a mite kianga khopkhawm ahih bangin, nang zong na kaltouhna tua mual ah sita inla, na mite kianga khop¬khawmin omta in. ⁵¹ Ahang bel, Zin Gamdai-gamkeua, Meriba Kadesh tuite muna Israel tate laka kei hon pahtawi lou a, amaute laka ka tunga na tatlek hang ahi. ⁵² Hinapi-in, na maia gam na mu ding a, Israel tate ka piak ding tua gamsung ah bel na lut kei ding hi, a chi hi.