Danpiakthakna 34

Paite Bible

Mosi in Gamchiam Gal-et

34 TUA khitin, Moab phaizang apanin, Jerikho gala Nebo Mual a sanna Pisga mualvum ah Mosi a kaltou hi. Tua apanin Tangtawn Toupa'n Gilead gam khempeuh, Dan gam dong, ² Naftali gam khempeuh, Judah gam khempeuh Tumlam Tuipi dong, ³ tua baan ah Simlam Negev, Jerikho Phaizang Zoar dong, amah a ensak hi. Jerikho bel, Tumsing Khawpi kichi ahi. ⁴ Tua khitin, Tangtawn Toupa'n amah kiang ah: Abraham leh Isak leh Jakob kianga: Na suante uh kiang ah ka pe ding, chi-a ka chiamna hiai gam ahi. Tu’n na mit mahmaha hon musak ka hi. Ahihhangin, tua mun tung dinga galkah lou ding na hi, a chi hi.

Mosi Sihna

⁵ Tuachi-in, Tangtawn Toupa’ sila Mosi, Moab gam ah, Tangtawn Toupa’ gen bangin a sita hi. ⁶ Ama’n Moab gama phaizang ah amah a vui hi. Tua bel, Beth Peor gal ahi. Ahihhangin, tuni dong kuama’n a haan a thei kei hi. ⁷ Mosi a sih-in, kum 120 -a upa ahi. Hinapi-in, a mit a mial nai kei a, a hatna tha zong a kiam kei hi. ⁸ Israel tate’n tua Moab phaizang ah, ni 30 sung Mosi a kah uhi. Tua bangin, Mosi suunna leh kahna nite hong beita hi.

Joshua in Mosi’ Tha Kheng

⁹ Tuin Nun’ tapa Joshua bel, Mosi in a tunga khut nga a hih manin,

pilna kha in a luahdim ahi. Tua bang ahih manin, Israel tate khempeuh in a thu a limsak uh a, Tangtawn Toupa'n Mosi a thupiak bangin a hihta uhi.

Israel Gama Mosi Pahtawina

¹⁰ Tua nungsang, Israel gam ah, Tangtawn Toupa'n kimaituaha a theih Mosi bang kamsang dang a omta kei hi. ¹¹ Tangtawn Toupa'n Aigupta gama Faro leh a silate mai leh, a gamsung khempeuha hih dinga a piak chiamtehnate leh thillamdangte khempeuh a piak kamsang dang a om kei hi. ¹² Mosi in Israelte khempeuh mitmuha vangletna thupi khempeuh leh, lau-a mulkimna thupi Mosi in a hihte khempeuh bang a hih thei kuamah dang a om kei hi.