Danpiakthakna 5

Paite Bible

Dan Sawmte Piakna^(A)

5 MOSI in Israelte khempeuh a sam a, a kiang uah: Israel aw, tuni-a na zak ua ka phuan danthusehte leh dante ngai un. Sin unla, zui ngeingei dingin pilvang un. ² Tangtawn Toupa eite Pathian in Horeb ah eite tawh kal ah thukhun khat a bawl hi. ³ Tangtawn Toupa’n hiai thukhun, i pu i pate tawh kala a bawl ahi kei a, tuni-a hiaia oma nungta lai eite khempeuh tawh kala a bawl ahi zaw. ⁴ Tangtawn Toupa’n tua mual tung ah, meikuang laka pan noute kiang ah kimaituahin thu a gen hi. ⁵ Tua laiin, meikuang lau a, muala na paitouh louh manun, Tangtawn Toupa’ thugen noute kianga phuang dingin, Tangtawn Toupa leh noute kal ah kei ka ding hi. Ama’n:

⁶ Kei Tangtawn Toupa, na

Pathian Aigupta gam, saltanna

gam apan hon piikhepa ka hi.

⁷ Ka maia keimah lou pathian

dangte na neih het louh ding ahi.

⁸ Tung vaan ah hiam, nuai lei ah

hiam, nuai tuite ah hiam, thil

khatpeuh lim leh mel nei

batpih milim na kibawl het

louh ding ahi. ⁹ Amaute’

maia na kuun het louh ding,

a nna uh zong na sep het

louh ding ahi. Ahang bel, kei

Tangtawn Toupa, na Pathian

thikthusia Pathian, kei hon

mudah pate’ khelhna a tate

uh a khang thumna leh khang

lina chiang dong gawtpa,

¹⁰ ahihhanga kei hon it a, ka

thupiakte zuite bel a a sang a

sang tunga itna muanhuai

langsakpa ka hi.

¹¹ Tangtawn Toupa na Pathian’

min na mawk zat hetlouh ding

ahi. Ahang bel, Tangtawn

Toupa’n ama’ min mawk zat

khat peuh mawhneilouin koih

lou ding ahi.

¹² Tangtawn Toupa na Pathian

uh’ hon thupiak bangin,

Sabbath ni siangthoua zangin

na tang ding ahi. ¹³ Ni guk sung

sem gimin, na nna na sem ding

ahi. ¹⁴ Ahihhangin, a ni sagih ni

bel Tangtawn Toupa na

Pathian adinga Sabbath ni ahi.

Tua ni-in nna himhim na sem

ding ahi kei. Na tapa hiam, na

tanu hiam, na sila pasal hiam,

na sila numei hiam, na

bawngtal hiam, sabiltung

hiam, gantate khat peuh hiam,

na kongpite sunga gamdang mi

hiam in zong nna a sem ding

uh ahi het kei. ¹⁵ Aigupta gama

sala om na hih lam uleh,

Tangtawn Toupa na Pathian un

khut hattak leh baan zaka tua

apan hon piikhia ahih lam thei

gige in. Tua bang ahih manin,

Tangtawn Toupa na Pathian in

Sabbath ni tang dinga thu hon

pia ahi.

¹⁶ Tangtawn Toupa’n thu hon

piak bangin, na nu leh na pa

zahtak in, tuachi-in na

khankhua sawt ding a,

Tangtawn Toupa na Pathian

in hon piak ding gam ah nang

adingin a hoih thei ding hi.

¹⁷ Tual na that ding ahi het kei.

¹⁸ Ang na kawm ding ahi het

kei.

¹⁹ Guk na gu ding ahi het kei.

²⁰ Na innveng tung ah theihpih

taklouin na pang ding ahi

het kei.

²¹ Na innvengpa’ zi na deihgawh

ding ahi het kei. Na innveng’

inn hiam, gam hiam, a sila

pasal hiam, a sila numei hiam,

a bawngtal hiam, a sabiltung

hiam, ama’ van neih hiam

deihgawhin na haza ding

ahi het kei,

a chi hi.

Israelte’ Dawnna

²² Mual tunga kikhawm noute khempeuh kianga, meikuang, meipi leh mial bibek apan aw ngaihtaka Tangtawn Toupa’n a phuankhiak thupiakte hiaite ahi. Ama’n hiaite baan ah, bang mah a behlap kei hi. Tua khitin, suangpek nih tung ah tuate a gelh a, kei hon pia hi.

²³ Tua mual meia a kuan laia, tua mial lak apan aw hong pawt noute’n na zak laiun, na nam makaite uleh na upate khempeuh uh ka kiang ah hong hawh uhi. ²⁴ Noute’n ka kiang ah: Ngai in, Tangtawn Toupa koute Pathian in a thupina leh letna hon ensak a, meikuang lak apan a aw ka zata uhi. Pathian in mi a houpih leh zong tua mi a nungta thei lai, chih tuni-in, ka muta uhi. ²⁵ Ahihhangin, tu-a banghanga si ding ka hi ua? Hiai meikuang thupi in koute hon kangtum ding a, Tangtawn Toupa koute’ Pathian’ aw za kik lai le ung, ka si ding uhi. ²⁶ Ahang bel, Pathian hing’ aw, meikuang lak apan thugen, koute zak banga za a nungta lai, mihing lak ah kua om ngei ahia? ²⁷ Naih inla, Tangtawn Toupa eite’ Pathian’ gen khempeuh ngaikhia in. Tua khit chiangin, Tangtawn Toupa eite Pathian in nang hon hilh peuhmah koute hon hilh in. Ka ngaikhe ding uh a, ka zui ding uh, na chi uhi.

Pathian’ Dawnna

²⁸ Kei non houpih laiun, Tangtawn Toupa’n a za a, Ama’n ka kiang ah: Hiai mite’n na kianga a gen uh ka za hi. A gen peuhmah uh a hoih hi. ²⁹ A tawntunga amaute leh a tate uh adinga a hoih nadingin leh kei hon laudan a siam nadingun,

a lungtangte uh keilam hong nga le uh aw!

³⁰ Pai inla, a puanbuk ua kik dingin amaute hilh in. ³¹ Ahihhangin, amaute luah dinga ka piak ding gama a zuih ding ua na sinsak ding thupiakte, danthusehte leh dante khempeuh kon piak theih nadingin nang zaw hiah om tadih in, a chi hi.

³² Tua bang ahih manin, Tangtawn Toupa noute’ Pathian in, noute hon thupiak zui dingin pilvang un. Taklam ah hiam, veilam ah hiam pialsan kei un. ³³ Na nuntak ua, na mavan ua, na luah ding uh gama na khantou nadingun, Tangtawn Toupa na Pathian un noute hon thupiak lampi khempeuh zui suak un.