Danpiakthakna 8

Paite Bible

Tangtawn Toupa Theih Gige ding

8 A nuntak theih nading uh, na pun theih nading uh leh, Tangtawn Toupa’n na pu na pate uh kianga kichiam zena a chiamsa gam na lut ua na luah theih nadingun, tuni-a kon thupiak peuhmah zui dingin pilvang un. ² A thupiakte na zui ding uhia, zui lou ding, chih na lungtangte uh thei nuama Tangtawn Toupa na Pathian un hon kingainiam a, hon ze-et a, hiai kum 40 sung, gamdai-gamkeu tawnsuaka hon pii dan thei gige un. ³ Noute hon kingainiamsak a, hon gilkialsak a, tua khitin noute leh na pu na pate un na theih ngeilouh uh manain hon vaak hi. Tua bel, mihing tanghou kiain a nungta kei ding a, Tangtawn Toupa’ kam apan hong pawt thu peuhmah in a nungta zaw ding, chih hon sinsak nop man ahi. ⁴ Hiai kum 40 sungin, na puansilhte uh luiin a se kei a, na khete uh zong a bawk kei hi. ⁵ Mi’n a tapa a thunun bangin, Tangtawn Toupa na Pathian un noute hon thunun ahi, chih lungtangin thei un.

⁶ Tangtawn Toupa na Pathian uh’ lampi tawnin leh amah laudan siamin a thupiakte zui un. ⁷ Ahang bel, Tangtawn Toupa na Pathian un gam hoiha hon piilut ding ahi. Tua gam bel, luite leh tuikhukte, luiphaite leh mualte, tuinakte omna ahi. ⁸ Huitbuh leh barlibuhte, grepguite leh theipikungte, mimtheite, oliv thau leh khuaizu pianna gam ahi. ⁹ Tanghou taksap louhna gam ahi a, tua ah bangmah na tasam kei ding uhi. A suangte sik ahi a, a mualte apan dalsik na laikhe ding uhi.

¹⁰ Na nek ua na tai chiangun, Tangtawn Toupa na Pathian un gam hoih hon piakna gam ah, amah phat un. ¹¹ Tuni-a noute hon piak a thupiakte, a dante leh a danthusehte zui lou a, Tangtawn Toupa na Pathian uh na mangngilh louh nadingun pilvang un. ¹² Tuachi louin zaw, na nek ua na tai chiangun, inn hoihte na lam ua, na teen chiangun leh, ¹³ na bawnghonte uleh na belamhonte uleh kelhonte uh hong pun a, na kham leh ngunte uleh na neih na lam uh hong pun chiangin, ¹⁴ na lungtang uh hong kisathei ding a, Aigupta gam, saltanna mun apan hon piikhepa Tangtawn Toupa na Pathian uh na mangngilh kha ding uhi. ¹⁵ Ama’n tua gamdai-gamkeu, gam dangtak leh tui om louhna gam zapi leh lauhuai, gul guneite leh aikamte omna gam tawnin hon pii a, meisah suangpi apan tui hon pia hi. ¹⁶ Gamdai-gamkeu ah nek dingin mana hon pia a, na pu na pate uh theih ngeilouh an ahi. A tawpin noute adinga a hoih nadingin hon kiniamkhiaksak a, hon ze-et ahi. ¹⁷ Noute’n: Ka vangletna leh ka bantha hatin hiai hauhna ka lamkhiak ahi, na chi mai thei uh. ¹⁸ Ahihhangin, Tangtawn Toupa na Pathian uh thei gige un. Amah ahi hauhna lamkhiak theihna hon pia a, na pu na pate uh kianga kichiama a thukhun tuni-a banga hihkippa.

¹⁹ Tangtawn Toupa na Pathian uh na mangngilh ua, pathian dangte zui a, a nna uh sem a, a mai ua na kun peuhmah uleh, hihmanthatin na om ngeingei ding uh chih, tuni’n noute kiang ah theihpihna ka gen ahi. ²⁰ Tangtawn Toupa’n na mai ua a hihmanthat namte bangin, noute zong Tangtawn Toupa na Pathian uh thu na man louh manun, hihmanthatin na om ding uhi.