Hebrute 2

Paite Bible

Vauhilhnate

2 TUA bang ahih manin, i tolhmang louh nadingin, i zaksate limtak-in i thudon sem ding a kisam hi. ² Ahang bel, vansawl¬takte’ tungtawna thu kigente a kip a, tuate palsatna leh thumanlouhna peuhmah in gawtna a kituak ngah hiven. ³ Tua bang ahih manin, tua zaha hotdamna thupi thudon kei lehang, eite bangchi suahtak theih peuhmah ding i hia? Hiai hotdamna, Toupa’n a phuankhiak masak hi a, tua zate mah in a dikna thu theihpihna eite kiang ah hon gen uhi. ⁴ Pathian mahmah in zong chiamtehna, thillamdangte, a tuam¬tuam vangletna nasep lamdangte

leh ama’ deihna banga a hawm Kha Siangthou thawnpiakte pansanin hiai a theihpih hi.

A Sanggamte banga Bawl Khrist

⁵ I gen, a hong tung ding leitung khuavannuai pen, ama’n vansawltakte’ thunuai ah a koih kei. ⁶ Ahihhangin, mun khat ah, kua hiam khat

in theihpihna thu pilvangtakin a

gen a:

Mihing bang hi peuhmah ahia,

hizahta-a na awlmawh?

Mihing tapa zong bang

hi peuhmah ahia,

hizahta-a na khawtuah?

⁷ Nang amah, vansawltakte sanga

nuainungzaw zeka bawl

chin a,

thupina leh pahtawina

khusak chin a,

na khutsuakte uksak chin a,

⁸ ama’ khepek nuaia

thil bangkim koih na hi,

a chi hi. Pathian in ama’ khepek nuaia thil bangkim a koih laiin,

koih louh bangmah a hawi kei hi. Hinapi-in, tuin, thil bangkim ama’ khepek nuaia kikoihin i mu tadih kei hi. ⁹ Ahihhangin, Pathian’ hehpihna pansana mi chih sik leh tanga sihna a thuak theih nadinga, vansawltakte sanga nuainungzaw zeka bawl takdiha ompa leh, sihna a thuakna hanga tu-a thupina leh pahtawina khuksaka ompa Jesu i mu hi.

¹⁰ Ahang bel, ama’ ading leh amah apan thil bangkim ompa Pathian adingin, tate tampi thupina-a piilutpa leh, amaute’ hotdamna bawlpa pen, thuakna tungtawna a bukimsak kilawm him ahi. ¹¹ Mite siangthousakpa leh a sianthousakte innkuan khat ahi uhi. Tua bang ahihmanin, amaute, sanggamte chih ding Jesu a maizum kei hi. ¹² Ama’n:

Ka sanggamte kianga

na min phuang ding ing a,

kikhawmte laka

nang phatna la sa ding hi’ng,

a chi hi.

¹³ Tua baan ah, ama’n:

Ke’n amah muang ding hi’ng,

a chi hi.

Tua baan ah, ama’n:

En un, Pathian hon piak

tate tawh hiaia om hi’ng,

a chi lai hi.

¹⁴ Tate bel sa leh sisan nei ahih manun, tua banga ama’n zong sa leh sisan nei mihing hihna tang sam ahi. Tua bel, ama’n a sihna pansana, sihna vangletna nei tua dawimangpa, vangletna beia a koih theih nading ahi. ¹⁵ Tua baan ah, a damsung teng uh sih launa sala tangte a suahtaksak theih nading ahi sawnsawn hi. ¹⁶ Ama’ panpihte zaw vansawltakte ahi het kei uh a, Abraham’ suante ahi zaw uhi. ¹⁷ Hiai hang mahin, amah zaw Pathian lungkimsak thei, zahngaithei leh a muanhuai siam¬pilian ahih theih nading leh, mite’ khelhnate khuhna a bawl theih nadinga bangkima a sanggamte bangbang a hong suah kul ahi. ¹⁸ Amah mah in zong khemna zolna tuaka hong thuak ahih manin, khemna zolna tuakte a panpih thei hi.