Isaias 66:2-4
Magandang Balita Biblia (with Deuterocanon)
2 Sa lahat ng bagay ako ang maylikha,
kaya ako ang may-ari ng lahat ng ito.
Ako'y nalulugod sa mga taong nagpapakumbaba at nagsisipagsisi,
sa mga may takot at sa utos ko'y sumusunod.
3 Ginagawa ng tao ang kanyang maibigan,
at matutuwa pang gumawa ng kasamaan.
Para sa kanya ay walang kaibahan ang handog na toro o kaya ay tao;
ang handog na tupa o patay na aso;
ang handog na pagkaing butil o dugo ng baboy;
ang pagsusunog ng insenso o ang pagdarasal sa diyus-diyosan.
Natutuwa sila sa nakakahiyang pagsamba.
4 Dahil dito, ipararanas ko sa kanila
ang kapahamakang kinatatakutan nila.
Sapagkat nang ako'y tumawag walang tumugon kahit na isa;
nang ako'y magsalita, walang gustong makinig.
Ginusto pa nila ang sumuway sa akin
at gumawa ng masama.”