Mathai 15

Paite Bible

Thugousiah thu-a Kiselna^(A)

15 TUA khitin, Jerusalema om Dan sinsakte leh Farisaite Jesu kiang ah hong pai uh a: ² Banghanga na nungzuite’n upate’ thugousiah ^[a] palsat a, khutsil masa loua an ne uh ahia? a chi uhi.

³ Jesu’n a dawng a: Banghanga noute’n zong thugousiah paulama Pathian’ thupiak palsat na hi ua? ⁴ Pathian’ thupiak in: Na nu na pa pahtawi in, chi a, tua baana, A nu hiam, a pa hiam gensia peuhmah si teitei hen, chi ahi. ⁵ Ahihhangin, noute’n bel: A nu hiam, a pa hiam kianga: Noute’ phattuampih ding ka neih ka lam teng Pathian kianga kilankhin ahita, chi mi peuhmah,

⁶ a nu a pa tunga a mawhpuakna pana siang ahi, chi-in na thugousiah

uh pansanin, Pathian’ thupiak bangmahlou na suaksak uhi. ⁷ Nou lepchiahte aw! Isai in noute tungthu a gen dik ngel e. Ama’n:

⁸ Hiai mite’n a kamun kei hon

pahtawi uh a,

ahihhanga a lungtang ua

hon gamlat uhi uh.

⁹ A mawknain hon bia uh a,

a sinsaknate uh

mihing’ thupiakte

lel ahi,

a na chi hi, a chi hi.

¹⁰ Tua khitin, Jesu’n a kiang

ah mipite a samkhawm a: Ka

thu ngaikhia unla, theisiam un. ¹¹ Mihing’ kamsunga lut in mihing a ninsak kei a, mihing kam apan pawt ahi mihing ninsak, a chi hi.

¹² Tua khitin, a nungzuite amah kiang ah hong pai uh a: Farisaite’n hiai thu a zak takun a ngaidah uh, chih na thei hia? hong chi uhi.

¹³ Ama’n a dawng a: Vantunga om ka Pa’ phuh louh kung peuhmah bawhkhiak hi ding ahi. ¹⁴ Amaute thudon kei un. Amaute, mittawte’ lamkaia pang mittaw lamkaite ahi uhi. Mittaw in mittaw a lamkaih taakin, kawkhuk ah a kekhawm mah kei ding ua, a chi hi.

¹⁵ Peter in a dawng a: Hiai gentehna koute hon hilhchian in, a chi hi.

¹⁶ Jesu’n amaute kiang ah: Noute tua zaha ngong lai na hi umaw? ¹⁷ Mihing kamsunga lut pen gilpi-a lut a, dailenna-a thakkhiak ahi, chih theisiam lou maw? ¹⁸ Ahihhangin, mihing kam apan pawtkhete bel lungtang apan hi a, tuate’n mihing ninsak ahi. ¹⁹ Ahang bel, lungtang apana ngaihsutna giloute, tualthahnate, angkawmnate, kingaihna ninte, guktaknate, theihpih taklouhnate, Pathian gensiatnate hong pawtkhia ahi. ²⁰ Hiaite ahi mihing ninsak. Khut sil loua an nek in mihing a ninsak kei, a chi hi.

Kanan Numei’ Tanu Damsakna^(B)

²¹ Tua khitin, Jesu tua mun apanin Tura leh Sidon gam zuanin a kipankhia hi. ²² Ngai in, tua ah Kanan numei khat, tua gam apan hong pai a om hi. Amah a kikou a, Jesu kiang ah: Toupa, David’ Tapa, ka tung ah zahngai in! Ka tanu dawi in a man a, nakpitakin a thuak hi, a chi hi.

²³ Ahihhangin, ama’n kam khatin zong a dawng kei hi. A nungzuite hong pai uh a: Eite nung ah hon samin kikou kou veh aw, amah paisak vaw, a chi uhi.

²⁴ Ama’n a dawng a: Israel belam mangte kiang kia-a sawl ka hi, a chi hi.

²⁵ Tua khitin, tua numei hong pai a, amah a bia a: Toupa, hon panpih in! a chi hi.

²⁶ Ahihhangin, ama’n a dawng a: Tate’ tanghou laksak a, uite kianga piak a kilawm kei, a chi hi.

²⁷ Tua numei in: Hi mah e, Toupa. Ahihhangin, uite’n zong a pu uh’ dohkan nuaia apan anneng kete a ne sam ve ua oi, a chi hi.

²⁸ Tua khitin, Jesu’n a dawng a: Numei, na upna a lian hi. Na nget bangin kon pia hi, a chi a, tua hun laitak mahin a tanu a damta hi.

Mi Tampi Damsakna^(C)

²⁹ Tua nungin, Jesu tua apan a kipankhia a, Galili Tuipi gei zuiin a pai a, mual pang ah a kaltou a, tua ah a tu hi. ³⁰ Tua ah mipi tampi a kiang ah hong pai uh a, khebaite, mittawte, pautheiloute, poihlongte leh a dang tampi hon paipih uh a, Jesu’ khebul hon tun uh a, ama’n amaute a na damsak hi. ³¹ Mipite’n pautheiloute pautheita a, poihlongte damta a, khebaite paitheita a, mittawte’n mutheita, chih a muh takun, lamdang a sa uh a, Israel’ Pathian a pahtawi uhi.

Mi 4,000 Vaakna^(D)

³² Tua nungin, Jesu’n a nungzuite a kiang ah a sam a: Hiai mipite ka kiang ah ni thum a omta uh a, nek ding bangmah lah a nei kei uh a, ka lainat mahmah hi. Amaute gilkialin ka paisak nuam kei, lamkal ah sawlsamin a bah kha ding uh, a chi hi.

³³ A nungzuite’n a dawng uh a: Hiai mun gamlapi hi a, mipi hiai zahzah nek ding kiching koi apan la mawk ding i hia? a chi uhi.

³⁴ Jesu’n: Tanghou beu bangzah na nei ua? chi-in a dong a, amaute’n: Sagih leh ngasa neu chikchik tawmkha, a chi uhi.

³⁵ Ama’n mipite leilaka tu dingin a hilh a, ³⁶ tua khitin, tanghou beu sagihte leh tua ngasate a la a, kipahthu a gen a, a balkham a, nungzuite khut ah a pia hi. Nungzuite’n mipite a pia uh a, ³⁷ mipite khempeuh in a ne uh a, a vah uhi. Tua khitin, mipite’ khamval nen seng sagih dim a luakkhawm uhi. ³⁸ Tua an nete, numei leh naupang sim louhin 4, 000 ahi uhi. ³⁹ Tua khitin, ama’n mipite a paisak a, amah bel long ah a tuang a, Magdala gam ah a pai hi.