Mathai 2

Paite Bible

Mipilte’ Vehna

2 KUMPIPA Herod’ vaihawm laia Judia gama Bethlehem khua-a Jesu a pian nungin, suahlam apan mipilte, Jerusalem khua ah

hong hawh uhi. ² Amaute’n: Judate’ kumpipa piang koia om ahia? Suahlam ah a aksi ka mu uh a, amah be dinga hong pai ka hi uh, a chi uhi.

³ Kumpipa Herod in hiai a zak takin patauin a lungzing a, Jerusalem khua-a miteng zong a lungzing uhi. ⁴ Ama’n siampi makaite leh Judate’ Dan sinsakte khempeuh a samkhawm a, Khrist koia piang ding hiam, chih

a dong hi. ⁵ Amaute’n a dawng

uh a: Judia gama Bethlehem ah. Kamsangpa in:

⁶ Nang Judia gama Bethlehem

aw,

Judah ukmite lak ah neupen

lou hial na hi.

Ahang bel, ka mi Israelte

chinga kem ding,

Ukpa khat nang apan hong

piang ding hiven,

chi-a na kigelh ahi,

a chi uhi.

⁷ Herod in mipilte a simin a sam a, tua aksi hong kilat hun ngenteltakin

a dong hi. ⁸ Tua khitin, amaute Bethlehem khua ah a sawl a: Pai unla, ngenteltakin tua naungek va zongkhia un. Ke’n zong amah ka vabiak theih nadingin, amah na muh chiangun kei hong hilh kik un, a chi hi.

⁹ Amaute’n kumpipa’ thu a zak takun, a paita uh a, suahlama tua aksi a muh uh, tua naungek tung zawn a tun a, a khawl masiah amaute’ mai ah a pai hi. ¹⁰ Amaute’n tua aksi a muh takun, nakpitakin a lungnuam uhi. ¹¹ Tua inn sung a valut takun, tua naungek, a nu Mari tawh a vamu

uh a, bokin amah a bia uhi. Tua khitin, a goubawmte uh a hong uh a, thawnpiakte a pia uhi. A thawnpiakte uh bel kham leh gimnamtui begawte leh murate ahi. ¹² Herod kianga kik nawn lou dinga Toupa’ vansawltak in amaute manglama a hilh manin, lampi tuam ah, a gam lam uh a zuanta uhi.

Aigupta Gama Taaina

¹³ Amaute paikhit nungin, ngai in, Toupa’ vansawltak, Josef kiang ah, a mangin hong kilaak a: Dingkhia inla, naungek leh a nu tonpih inla, Aigupta gam ah taai in. Herod in naungek thah dinga zong dek a hih manin, thu kon hilh mateng tua ah om in, a chi hi.

¹⁴ Tua bangin, amah a dingkhia a, naungek leh a nu a tonpih a, zankhangin Aigupta gam zuanin a kipankhia uhi. ¹⁵ Amaute, Herod sih dong tua ah a om uhi. Tua bel, Toupa’n kamsangpa’ kama: Aigupta gam apan ka tapa ka samkhia, chi-a a na gen a tangtun nading ahi.

Naupangte Thahna

¹⁶ Mipilte’n amah a zekhem uh, chih Herod in a phawkkhiak takin a heh mahmah hi. Tuachi-in, mi a sawl a, Bethlehem leh a kiim gama om pasal naupang, kum nih chiang nuailam teng a thatsak hi. Hiai bel, mipilte a dotna apan a hun a suikhiak banga a hih ahi. ¹⁷ Hibangin kamsang Jeremia’ gensa tangtung ahi. Ama’n:

¹⁸ Rama ah aw kiza a, kahna leh

nakpi-a suunna aw hi ahi.

Rakhel in a tate a om nawnlouh

manun kah a, nep zawh hi

lou hi,

a na chi hi.

Nazareth Khua-a Jesu’ Kikna

¹⁹ Herod a sih takin, ngai in, Aigupta gama Josef kiang ah, a mangin Toupa’ vansawltak hong kilaak a: ²⁰ Dingkhia inla, naungek leh a nu tonpih inla, Israel gam ah paita in. Naungek thah dinga zongte sita uhi, a chi hi.

²¹ Amah a dingkhia a, naungek leh a nu a tonpih a, Israel gam ah hong pai uhi. ²² Ahihhangin, Arkhelos in a pa Herod’ mun luahin Judia gam ah vai a hawm, chih Josef in a zak takin, a lau a, Judia gam a tung ngam kei hi. A manga hilha a om bangin, Galili gam lam ah a kiheita hi. ²³ Nazareth kichi khua khat hong tung a, tua ah a teengta hi. Hiai bel, kamsangpa kama: Amah Nazareth mi kichi ding ahi, chi-a kigen a tangtunna ahi.