Mathai 23

Paite Bible

Tunggiknate^(A)

23 TUA nungin, Jesu’n mipite leh a nungzuite kiang ah thu a gen a: ² Dan sinsakte leh Farisaite, Mosi’ tutphah ah a tu uh. ³ Tua ahih manin, noute hon hilh peuhmah uh zui unla, hih un. Ahihhangin, amaute’ hihte bel hih kei un. Ahang bel, a gente uh amau mah in zong zui lou uh hiven. ⁴ Puakgik puakzawhlouh pipi mite a suan uh a, amaute’n lah tuate khut melengin zong a dom nuam kei uhi.

⁵ Ahih peuhmah uh mite muh ding deiha a hih uh ahi lel hi.

Tala a khip uleh khuta a buhte uh

a lianphaphain a bawl uh a, a puansilh mong nelkaite uh zapipi in a hawi uhi. ⁶ Ankuang luina muna zahbawlna tutna leh sunagog a tutna poimawhpente a deih uh a, ⁷ sumsinna muna mite’ muah khawng, Rabi chi-a sap khawng a nuamtuam uhi.

⁸ Ahihhangin, noute zaw, ^[a] Rabi, chihin om kei un. Ahang bel, Sinsakpa khat na nei uh a, amah Khrist ahi a, noute lah unau sanggam ngen na hi uhi. ⁹ Leitung ah kuamah, Pa, chi-in sam kei un. Pa khat na nei uh a, amah vantunga om ahi. ¹⁰ Sinsakpa, chihin om kei un. Sinsakpa khat na nei uh a, amah Mesia ahi. ¹¹ Noute laka lianpen, na sila ua a pan ding ahi. ¹² Amah kipahtawi mi peuhmah niamsak ahi ding a, amah kiniamsak mi peuhmah pahtawi ahi ding hi.

Dan Sinsakte leh Farisaite’ Tunggiknate

¹³ Nou Dan sinsakte leh Farisai lepchiahte aw, na tung uh a gik hi. Mite’ mai ah vantung kumpigam kongkhakte na khak uh a, nou lah lut nuamlou, midang lah lutsak

lou hi ve uchin. ¹⁴ Nou Dan sinsakte leh Farisai lepchiahte aw, na tung uh a gik hi! Meigongte’ innte nawmvalh a, kineiha sawtpipi thum khemkhem hi ve uchin.

¹⁵ Nou Dan sinsakte leh Farisai lepchiahte aw, na tung uh a gik hi! Juda sabiaka phungkai khat leltak man dingin, gam leh tuipi kanin na zin uh a, na mat khit chiangun, noute sanga a lehniha gawtmun ta suaksak zel hi ve uchin.

¹⁶ Nou makai mittawte aw, na tung uh a gik hi! Tempul siala kichiam mi kuapeuh in bangmah a hih a kul kei, ahihhangin, tempula kham sum siala kichiam mi peuhmah in, a tangtun teitei a kul, na chi uh. ¹⁷ Koi thupizaw-a lianzaw ahia, tua kham maw, ahih kei leh tua kham siangthousak tua tempul? ¹⁸ Tua baan ah, maitam siala kichiam mi peuhmah in bangmah ahih a kul kei, ahihhangin, maitam tunga kikoih thawnpiak siala kichiam mi peumah in a tangtun teitei a kul, na chi uh. ¹⁹ Nou mittaw mihaite! Koi thupi zaw-a lianzaw ahia, tua thawnpiak maw, ahih kei leh, tua thawnpiak siangthousak tua maitam? ²⁰ Tua bang ahih manin, maitam siala kichiam mi kuapeuh, tua maitam leh a tunga omte khempeuh siala kichiam ahi. ²¹ Tempul siala kichiam mi kuapeuh, tua tempul leh a sunga Teengpa siala kichiam ahi. ²² Tua baan ah, vaan siala kichiam mi kuapeuh, Pathian’ kumpitutphah leh a tunga Tupa siala kichiam ahi.

²³ Nou Dan sinsakte leh Farisai lepchiahte aw, na tung uh a gik hi! Pudinate, lengmaselte, pasikhawmte sawma khat na pia uh a, dan poimawh zaw- dika vaihawmnate, zahngaihnate leh muanhuainate

na limsak kei uh. Adangte hih

lou tuan louin, hiaite ahi na hih ding uh. ²⁴ Makai mittawte aw! thouvai khisiangin, sangawngsau na nawmvalh uh.

²⁵ Nou Dan sinsakte leh Farisaite, mi lepchiahte aw! Nou leh kuang a pawlam na silsiang uh a, a sunglam lah nekgukna leh nuamtatna-in a dim hi. ²⁶ Farisai mittawte aw! Nou leh kuang a sunglam silsiang masa le uchin, a pawlam zong siang thei ding hi.

²⁷ Nou Dan sinsakte leh Farisai lepchiahte aw, na tung uh a gik hi! Han pua nuhngou kilawm mahmah, a sung lah misi guhte leh a niin chitenga dim tawh kibang na hi uh. ²⁸ Mite’ muhin tua bangin na kilang uhi. Pawlam ah midiktat bangin na kilang uh a, sunglam ah lah lepchiahna leh danbei gamtatna tawh na kidim uhi.

²⁹ Nou Dan sinsakte leh Farisai lepchiahte aw, na tung uh a gik hi! Kamsangte’ hansuangte na dawh uh a, mi diktatte’ hante na zem uh a: ³⁰ I pu i pate khanlaia om kha hi lehang, kamsangte’ sisan suahna ah i pang kei mah ding, na chi uhi. ³¹ Tua bang ahih manin, kamsangte thatte’ suante na hi uh, chih noumau mah kitheihpih na hi uhi. ³² Na pu na pate uh’ mawhna sungdim vanglak ve ua!

³³ Nou gulte, gul suante aw! Gawtmun mawhtansakna bangchi pelh ding na hi ua? ³⁴ Tua bang ahih manin, na kiang uah kamsangte, mipilte leh Dan sinsakte kon sawl ding a, amaute pawlkhat na that ding uh a, na kilhlum ding uh. Pawlkhat na sunagogte khawng uah na sat ding uh a, khua teng ah na mawkbawl ding uh. ³⁵ Tuachi-in, mi diktatte’ sisan, midiktat Abel sisan apan tempul leh maitam kala na thah uh Berekhia’ tapa Zekharia’ sisan donga mawh noute tung a tu ding. ³⁶ Noute thutak kon hilh ahi: Hiaite khempeuh, hiai khanga mite tung ah a tung ding hi.

Jerusalem Kahkhumna

³⁷ Jerusalem aw, Jerusalem, nang kamsangte that a, na kianga hong kisawlte suanga deng! Bangzah vei ahia, akpi in a noute a khanuaia a opkhum banga na tate opkhum ka tup a, na utlouh uh! ³⁸ En un! Pathian in na innte uh kilawisak ding a hita. ³⁹ Ahang bel, Toupa’ mina hong paipa mi nunnuam ahi, na chih masiah uh kei non mu nawn kei ding uhi, kon chi ahi, a chi hi.