Mathai 25

Paite Bible

Nungak Siangthou Sawm Gentehna

25 TUA hun chiangin, vantung kumpigam zaw, nungak siangthou sawm, mouneipa muak dinga kuankhia tawh kibang ding hi. ² Tua nungakte laka nga a pil uh a, nga bel a hai uhi. ³ Ahaite’n meivakte keng napi-in, a meivaktui a keng kei uhi. ⁴ A pilte’n bel, meivakte tawh meivaktui a keng khawm uhi. ⁵ Mouneipa hong zekai manin, amaute khempeuh ihmut suakin a na ihmu uhi.

⁶ Zankhang laiin, kikou aw khat in: Ngai un, mouneipa hong pai! Amah muak dingin kuankhia un! a chi hi.

⁷ Tua nungak siangthoute a vekun a khanglou uh a, a meivakte uh a hahsiang uhi. ⁸ A haite’n a pilte kiang ah: Na meivaktui uh hon hawm un. Ka meivakte uh mit dek hi, a chi uhi.

⁹ Apilte’n a dawng uh a: Hi lou e, koute leh noute adinga kiching lou ding hi. Pai unla, a zuakte kiang apan nou ading valei un, a chi uhi.

¹⁰ Tua banga meivaktui lei dinga a kuan kal-un, mouneipa hong tung a, a mansate’n bel, kitenna ankuang um dingin amah a zuilut uhi. Amaute a lutkhitun, kongkhak khak ahita hi.

¹¹ Tua nungin, nungak siangthou dangte zong a hong pai uh a: Toupa, Toupa, kong hon hon in! hong chi uhi.

¹² Ahihhangin, ama’n a dawng a: Noute thutak kon hilh ahi. Noute kon thei ngei kei, a chi hi.

¹³ Tua bang ahih manin, kiveng un. Mihing Tapa kong pai nading a ni, ahih kei leh, a hun na thei kei uhi.

Talen Sum Gentehna^(A)

¹⁴ Tua baan ah, vantung kumpigam zaw, mi khat khualzin dinga kisa a, a silate sam a, amaute muanga sum zangsak tawh kibang ahi. ¹⁵ Ama’n sila khat khut ah talen nga a pia a, sila dang khat khut ah talen nih a pia a, a dang khat khut ah talen khat a pia hi. Amaute’ hihtheihna tawh kikhom a piak tek ahi. Tua khitin, amah a zinkhe pahta hi.

¹⁶ Talen nga sangpa a pai a, talen ngain a sumsin a, talen nga dang a meetsak pah hi. ¹⁷ Tua mah bangin, talen nih sangpa’n talen nih dang a meetsak pah hi. ¹⁸ Ahihhangin, talen khat sangpa bel a pai a, lei a khuak a, tua ah a pu’ sum a seel hi.

¹⁹ Hun sawtpi nungin, tua silate’ toupa hong tung kik a, amaute tawh sum thu a suutkhawm uhi. ²⁰ Talen nga sangpa hong pai a, talen nga dang tawh hon tawi a: Toupa aw, talen nga zang dingin non muanga, en in, talen nga dang ka metsak hi, a chi hi.

²¹ A toupa’n a kiang ah: Na hih hoih e, sila hoih leh muanhuai. Thil tawmchik tung ah na muanhuai a, tampi tunga thuneiin kon bawl ding. Na toupa’ lungnopna tanpihta in! a chi hi.

²² Talen nih sangpa zong hong pai a, talen nih dang tawh hon tawi a: Toupa aw, talen nih zang dingin non muanga, en in, talen nih dang ka metsak hi, a chi hi.

²³ A toupa’n a kiang ah: Na hih hoih e, sila hoih leh muanhuai. Thil tawmchik tung ah na muanhuai a, tampi tunga thuneiin kon bawl ding. Na toupa’ lungnopna tanpihta in! a chi hi.

²⁴ Tua khitin, talen khat sangpa hong pai a: Toupa aw, mi chilgiltak, na tuh louna-a at a, na theh louhna-a kaikhawm mi na hi, chih ka thei. ²⁵ Tua bang ahih manin, ka lau a, vapaiin na talen leilak ah ka vaphum hi. En in, hiai nang’-a ngei mah ahi, a chi hi.

²⁶ A toupa’n a dawng a: Nang sila gilou leh thadah! Ka tuh louhna-a at a, ka theh louhna-a kaikhawm mi ka hi chih na thei maw? ²⁷ Tua hang mahin, sum leitawisakte khuta ka sum na koih a, kong pai kik chianga, ka sumpi, a meet tawh ka muh kik ding hilou maw!

²⁸ Tua talen laksak unla, sawm neipa pia un. ²⁹ Ahang bel, a nei mi peuhmah tamsem kipiak behlap ding a, tampi nei ding hi. Ahihhangin, a nei lou mi bel, a neihsun nangawn kilaksak ding hi. ³⁰ Tua khit chiangin, mannabei sila pen, pawlam miallak ah paikhia un. Tua ah kah leh hagawi a om ding, a chi hi.

Belamte leh Keelte kal Thukhenna

³¹ Mihing Tapa, ka thupina tawh, vansawltak siangthoute khempeuh tawh, kong pai chiangin, ka

thupina kumpitutphah tung ah ka

tu ding. ³² Tua hun chiangin, namte khempeuh ka mai ah kaihkhawm ahi ding a, amaute pawl nihin ka khen ding. Belamchingpa’n kelte apan belamte a khenkhiak bang ahi ding hi. ³³ Tua hun chiangin, ke’n belamte ka taklam ah ka koih ding a, kelte ka veilam ah ka koih ding.

³⁴ Tua khit chiangin, kei Kumpipa’n ka taklama omte kiang ah: Ka Pa’ vualzawlte aw, hong pai unla, leitung kisiam ma-a noute adinga bawlsa kumpigam luah un. ³⁵ Ahang bel, gilkiala ka omin an non pia uh a, dangtaka ka omin dawn ding non pia uh. Mikhuala ka omin non zintun uh a, ³⁶ vuaktanga ka omin silh ding non pia uh a, china-a ka omin, nong veh uh a, suangkula ka tanin nong veh uh, ka chi ding.

³⁷ Tua hun chiangin, mi diktatte’n hon dawng ding uh a: Toupa, chikin eita nang gilkiala kon muh ua, an kon piak uh? Ahih kei leh, dangtaka kon muh ua dawn ding kon piak uh? ³⁸ Chikin eita nang mikhuala kon muh ua, kon zintun uh? Ahih kei leh vuaktanga kon muh ua, silh ding kon piak uh? ³⁹ Chikin eita china-a kon muh ua, ahih kei leh suangkul tanga kon muh ua, kong veh uh? a chi ding uhi.

⁴⁰ Kei kumpipa’n amaute ka dawng ding a: Noute thutak kon hilh ahi: Hiai ka sanggamte laka neupen tunga na hih zahzah uh, keima’ tunga hih na hi uh, ka chi ding hi.

⁴¹ Tua baan ah, ke’n veilama omte kiang ah: Nou hamsethuakte aw, ka kiang apan paimang unla, dawimangpa leh a vansawltakte adinga kibawl tangtawn meidil ah lut un. ⁴² Ahang bel, gilkiala ka omin an non pe kei uh a, dangtaka ka omin dawn ding non pe kei uh. ⁴³ Mikhuala ka omin non zintun kei uh a, vuaktanga ka omin silh ding non pe kei uh a, china leh suangkul tanga ka omin nong veh kei uh, ka chi ding.

⁴⁴ Tua hun chiangin, amaute’n zong hon dawng ding uh a: Toupa, chikin eita, gilkialin hiam, dangtakin hiam, mikhualin hiam, vuaktangin hiam, chinain hiam, suangkul tangin hiam kon muh ua, kon don louh uh? a chi ding uh.

⁴⁵ Ken amaute ka dawng ding a: Noute thutak kon hilh ahi: Hiai ka sanggamte laka neupen tunga na hih louh uh, keima’ tunga hih lou na hi uh, ka chi ding hi.

⁴⁶ Tua hun chiangin, amaute tangtawn gawtna ah a lut ding uh a, mi diktatte bel tangtawn hinna ah a lut ding uhi, a chi hi