Mikas 1:2-4

Magandang Balita Biblia

² Pakinggan ninyo ito, mga bansa,
    kayong lahat na naninirahan sa buong daigdig.
Ang pahayag ng Panginoong Yahweh laban sa inyo ay pakinggan.
    Siya'y nagsasalita buhat sa kanyang banal na templo.
³ Lalabas si Yahweh mula sa kanyang dakong banal.
    Bababâ at maglalakad sa mga sagradong bundok.
⁴ Sa sandaling yapakan niya ang mga bundok,
    ang mga ito'y matutunaw.
At ang mga libis ay mabibiyak na gaya ng kandilang nadarang sa init ng apoy,
    gaya ng tubig na aagos mula sa burol.