Pianchilna 3

Paite Bible

Mihing Zolna

3 TANGTAWN Toupa Pathian in a siamsa gamsate lak ah gul a gitlouh pil pen hi. Tua gul in numei kiang ah: Huan sunga singkung peuhpeuh apan na nek louh ding uh ahi, Pathian in hon chi taktak maw? a chi hi.

² Tua numei in gul kiang ah: Huan sunga sing gahte ne thei mah n’ung. ³ Ahihhangin, Pathian in: Huan laizanga sing pen bel a gah na nek louh ding uh ahi, khoih zong na khoih louh ding uh ahi, na nek uleh na si ding uh, hon chi ahi, a chi hi.

⁴ Tua gul in numei kiang ah: Si peuhmah kei n’u teh. ⁵ Tua sing gah na nek nini-un, na mitte uh hong vak ding a, a sia a pha theia Pathian bang ding na hi uh, chih Pathian in a theih man ahi zaw, a chi hi.

Mihing Pukna

⁶ Tua bangin, numei in tua sing gah nek dingin a duh a, a mitin a enlah a, amah pilsak dingin a lunggulh hi. Tua bangin, ama’n sing gah a lou a, a neta hi. Amah tawh omkhawm a pasal zong a pia a, a pasal in zong a neta hi. ⁷ A mitte uh hong vakta a, vuaktang ahih lam uh hong kiphawkta uh a, theipi tehte a khuikhawm uh a, kikhuhnain a nei uhi.

Mihing tunga Thukhenna

⁸ Tua khitin, Tangtawn Toupa Pathian, tua huan sung ah, nitaklam nineem laiin hong pai hi. Amaute’n a aw a za uh a, huan sunga sing lak ah Pathian apanin a kiseel uhi. ⁹ Tangtawn Toupa Pathian in tua pasal a sam a: Adam, koia om na hia? a chi hi.

¹⁰ Ama’n: Huan sunga nong pai laiin, na aw ka za a, vuaktang ka hih manin, ka lau a, ka kiseel hi, a chi hi.

¹¹ Tangtawn Toupa Pathian in: Kua’n vuaktang na hi, chi-a hon hilh ahia? Nek louh ding, chi-a kon kham sing gah ne na hita maw? a chi hi.

¹² Adam in: Ka ompih dinga non piak numei in sing gah hon pia a, ka neta ve, a chi hi.

¹³ Tangtawn Toupa Pathian in numei kiang ah: Bang hih na hita maia? a chi hi. Numei in: Gul in hon khemzou a, ka neta ve, a chi hi.

¹⁴ Tangtawn Toupa Pathian in

gul kiang ah:

Hiai thil na hih manin,

ganta leh gamsa khempeuh

sanga hamsiat zawk na hi.

Na gilin na kitholhta ding a,

na damsung teng leivui na neta

ding.

¹⁵ Nang leh numei kal ah,

na suan leh numei suan kal ah,

kimelmakna ka koih.

Numei’ suan in na lutang

a gawpsak ding a,

nang a khetul na tu ding,

a chi hi.

¹⁶ Tangtawn Toupa Pathian in

numei kiang ah:

Na lungkhamna leh na nau neih

thuakgimna

nakpitakin ka behlap ding a,

natakin nau na nei ding.

Na lunggulh na pasal ahi

ding a,

ama’n nang hon uk ding,

a chi hi.

¹⁷ Tangtawn Toupa Pathian in

Adam kiang ah:

Na zi thu na mang a,

Tua sing apan na nek

hetlouh ding ahi,

chi-a tua sing tawh kisaia

kon kham

sing gah na nek manin,

nang ziakin lei ka hamsiatta.

Na damsung teng gimtak leh

tawltakin lei gah na neta ding.

¹⁸ Lei in nang adingin

lingte leh loulingneite

a suah ding a,

gamlak louhingte na neta ding.

¹⁹ Leia na kiknawn mateng,

na maitanga khawul luangin

an na neta ding.

Lei apan lakkhiak leivui

na hih manin,

leivui ah na kiknawn ding,

a chi hi.

²⁰ Adam in a zi, mihing teng khempeuh’ nu hong hi ding ahih manin, a min dingin Evi ^[a] a sa hi.

²¹ Tua khitin, Tangtawn Toupa Pathian in Adam leh a zi adingin, savun puanakte a bawlsak a, amaute a silhsak hi.

²² Tua baan ah, Tangtawn Toupa Pathian in: Ngai un, tua mihing, a sia a pha theiin eite laka khat a bangta. A khuta sawk in hinna sing gah louin a ne kha ding a, tua banga a hinden louh nadingin hih ni, a chi hi. ²³ Tua bangin, Tangtawn Toupa Pathian in amah a lakkhiakna lei mah khou dingin, tua Eden huan sung apanin Adam a hawlkhia hi. ²⁴ Tangtawn Toupa Pathian in amah a hawlkhiak nungin, hinna sing kung zotna lampi veng dingin, Edena Huan suahlam pang ah Cherubte leh namsau kuang zualzual, lehlam lehlama kipei thei khat a koih hi.