Pianchilna 34

Paite Bible

Dina leh Shekhemte

34 JAKOB in Lea tawh kala tanu a neih Dina ahi. Amah tua gam nungakte veh dingin a vapawtkhia hi. ² Hamor’ tapa Shekhem in Dina a muhtakin, a tonpih a, a luppih hi. Hamor bel Hiv mi ahi a, tua gam kumpipa’ tapa ahi. ³ Jakob’ tanu in Shekhem’ lungtang a lazou mahmah a, Shekhem in tua nungak a it a, kamsiam takin a houpih hi. ⁴ Shekhem in a pa Hamor kiang ah: Hiai nungak ka zi dingin hon piisak in, a chi hi.

⁵ Jakob in a tanu hihbuahin a om, chih a zak laiin, a tapate gamlak ah, a ganhonte utawh a om uhi. Amaute inn hong tun mateng uh bangmah gen louin a om hi.

⁶ Tua sungin, Jakob houpih dingin Shekhem’ pa Hamor hong kuan hi. ⁷ Jakob’ tapate’n thu a zak takun, gamlak apan hong pai uhi. Shekhem in Jakob’ tanu luppih a, ahih louh dingpi, thil zahlakhuaipi Israel gama a hih manin amaute’n a ngaidah lua uh a, a heh mahmah uhi.

⁸ Ahihhangin, Hamor in amaute kiang ah: Ka tapa Shekhem in na tanu uh lunggulh mahmah a, hehpihtakin a zi dingin hon pia un. ⁹ Koute tawh kitentuahna bawl unla, na tanute uh hon pia unla, noute adingin ka tanute uh pii un. ¹⁰ Hi leh, koute lak ah na teeng ding uh a, nou adingin gam a awng ding hi. Teeng unla, sum sin unla, a sung ah neih leh lam khawm un, a chi hi.

¹¹ Shekhem in Dina’ pa leh sanggamte kiang ah: Na deihsakna uh hon musak unla, non nget peuhmah uh hon pia ning. ¹² Mou man ding leh thawnpiak ding na

ut zah zah uh gen unla, na gen dandan uh hon pia ning. Nungaknu bel ka zi dingin hon pe mahmah un, a chi hi.

¹³ Shekhem in a sanggamnu uh Dina hihbuahta ahih manin, Jakob’ tate’n Shekhem leh a pa Hamor tawh a kihou laiun, zekhemin a dawng uhi. ¹⁴ Amaute kiang ah: Tua bangin hih thei kei n’ung. Zeksumlouh pasal adingin ka sanggamnu uh pe thei kei n’ung. ¹⁵ Ka lemsak theihna uh thil khat kia a om. Koute bangin pasal khempeuh in zeksum un. ¹⁶ Tua hi leh, ka tanute uh kon pe ding uh a, na tanute uh ka nei sam ding uh. Tua khit chiangin, noute lak ah

ka teeng ding uh a, noute tawh minam khat ka suak ding uh. ¹⁷ Ahihhangin, zeksum dinga ka thu uh na ngaihkhiak nop kei uleh bel, ka sanggamnu uh tonpihin ka pai ding uh, a chi uhi.

¹⁸ Tua banga a thu sawm uh, Hamor leh a tapa Shekhem in pha a sa uhi. ¹⁹ Tua tangvalpa, a pa’ innsunga pahtawipen in Jakob’ tanu deih mahmah ahih manin, amaute’ gen bangin a hih pah hi. ²⁰ Tua bangin, Hamor leh a tapa Shekhem in, amaute’ khawpi kongpia paiin, a khawmite uh a houpih uh a: ²¹ Hiai mite’n eite hon lawmbawl uh a, i gam ah teeng uh henla, sumsin uhen. Amaute adingin gam kiching mahmah hi. A tanute uh eite’n zi dinga nei thei ding a, eite’ tanute zong amaute’n zidinga nei thei ding uhi. ²² Ahihhangin, thil khat ngiat a nei uh a, eite laka pasalte, amaute banga zeksum ding, hi leh eite laka teeng a, eite tawh minam khat suak ding, chi uhi. ²³ Tua hileh, amaute’ gante, amaute’ neih leh lamte leh, ganta dangte khempeuh eite’-a hi ding hilou maw? Tua bang ahih manin, a thusawm uh lemsakpih ni. Tua hi leh, amaute eite laka teeng ding uhi, a chi uhi.

²⁴ Tua khawpi kongpi apana paikhia pasal teng khempeuh in Hamor leh a tapa Shekhem a kithukimpih uh a, khawpi-a pasal teng khempeuh zek a sumsak uhi.

²⁵ Ni thum nungin, amaute khempeuh in na a thuak laitakun, Jakob’ tapa nih, Dina’ sanggamte Simeon leh Levi in a namsaute uh tawiin, tua khawpi bangmah lau ding omlou, galmuangtaka om a buluh uh a, pasal teng khempeuh a that uhi. ²⁶ Hamor leh a tapa Shekhem zong namsauin a that uh a, Shekhem’ inn apanin Dina a piikhia uh a, a paikhia uhi. ²⁷ Jakob’ tapa dangte’n mithah luangte a mu uh a, a sanggamnu uh hihnit a hihna tua khawpi a lok uhi. ²⁸ Amaute’ belamhon leh kelhonte leh, bawnghonte leh sabiltungte leh, tua khawpi sung leh gamlaka om, amaute’-a ahi khempeuh a la uhi. ²⁹ Amaute’ hauhnate khempeuh, amaute’ numeite leh tate khempeuh leh, innsunga om van khempeuh, gallakin a pawmang vek uhi.

³⁰ Jakob in Simeon leh Levi kiang ah: Hiai gama teeng Kanante leh Perizte’ mai ah kihhuai non suaksakta uhi. Kei leh ka innkawte lah tawm mahmah a, amaute khempeuh pangkhawmin kei hon dou ding uh a, kei leh ka innkawte hon thatgam ding uhi, a chi hi.

³¹ Ahihhangin, amaute’n a dawng uh a: Ama’n ka sanggamnu uh kizuak bawlin a bawl thei vial dia hia? a chi uhi.